Jowhar – ( Radio Isnaay ) – Ange Postecoglou ayaa laga ceyriyay shaqada Tottenham 16 maalmood ka dib markii uu ku hogaamiyay guushii finalka Europa League.
Guul 1-0 ah oo ay ka gaadheen kooxda Manchester United oo ka dhacday Bilbao ayaa Spurs u horseeday koobkeedii ugu horreeyay muddo 17 sano ah.
Si kastaba ha ahaatee, waxay timid hanashada koobkaasi dhamaadkii xilli ciyaareedkoodii ugu xumaa ee Premier League, iyadoo kooxda reer London ay ku dhameysatay kaalinta 17aad ka dib markii laga badiyay 22 ka mid ah 38 kulan oo ay ciyaartay horyaalka.
Tababarahaan reer Australiya ayaa u sheegay taageerayaasha “xilliga seddexaad ayaa ka wanaagsan xilli ciyaareedka labaad” iyagoo isugu soo baxay dhoolatus guul oo lagu xusayay guulaha Yurub ee ololahiisa labaad.
Iyadoo ay taasi jirto, 59-sano jirkaan ayaa waqtigiisii waqooyiga London dhamaaday labo sano uun ka dib markii kooxda Spurs ay ku shaacisay inuu uga soo biirayo Celtic heshiis afar sano ah.
Tababaraha Brentford Thomas Frank ayaa loo arkaa inuu yahay musharaxa ugu horreeya ee bedelaya Postecoglou. Tababaraha Bournemouth Andoni Iraola, kan Fulham Marco Silva, kan Crystal Palace Oliver Glasner iyo tababarihii hore ee Spurs Mauricio Pochettino – oo hadda maamula Mareykanka – ayaa ka mid ah musharaxiinta kale ee la tixgeliyey.
