Jowhar – ( Radio Isnaay ) – Madaxweynaha dalka Tunisia Qays Saciid ayaa si weyn ugu guuleystay doorashadi madaxtinimo ee Axaddii ka dhacday dalkaasi.
Kaddib marki uu muudo xileedkiisii koowaad ee soo billowday sannadki 2019-ki uu wax ka baddalay dastuurka, baarlamaanka kala diray, mucaaradkana xabsiga dhigay, ayuu Qeys hadda sii xajistay awoodda dalka.
Guddiga doorashada ee dalkan dhaca Waqooyiga Afrika ayaa Isniinti shalay ku dhawaaqay in Qays Saciid uu codbixinti Axaddii ka helay in ka badan 90.7%.
Hadal uu ka jeediyay xarunta dhexe ee ololihiisii doorashada ayuu 66 jirkaan ku sheegay, in dalka uu ka nadiifin doono dhammaan musuq-maasuqa iyo qaswadayaasha. Wuxuu ballan qaaday in uu Tunisia ka difaaci doono khataraha gudaha iyo dibadda.
Qeys ayaa doorashada kaga guuleystay laba murashax oo la tartantay, kuwaas oo kala ah Zuheyr Magzawi oo ay mar xulafo wada ahaayeen, balse isu baddalay mucaarad, iyo Cayaash Zaamel oo doorashada ka qeybgalay isaga oo xiran.
