Jowhar – ( Radio Isnaay ) – Ku dhawaad 2:20 habeenimo xalay ayay ahayd markii Messi uu saxaafada gegida Lusail Stadium waraysi ku siiyay iyagoo mudo sugayay inta uu dabaaldega qolka labiska soo dhammaysanayay.
Kulanka kaddib Messi ayaa markale xaqiijiyay inuu yahay kulanka Axadu midkiisii ugu dambeeyay Koob aduun isla markaana uu rajaynayo inuu sida ugu wanaagsan ku dhammaysto halka uu dhinaca kale amaan ugu qubeeyay xiddigaha xulka kala tirsan.
“Waan ku faraxsanahay inaan safarkayga koobka aduunka ku dhammaysto anigoo ciyaaraya Final, waxa aan halkan kala kulmayaa waa wax xiiso leh, hubaal Axada wuxuu noqon doonaa kulankaygii ugu dambeeyay ee Koob aduun” ayuu yidhi Messi.
“Sanado badan ayaa inaga xiga koob aduunka xiga (2026) umana malaynayo inaan awoodi doono inaan ka ciyaaro sidaas darteed waxaan rajaynayaa inaan qaabka ugu wanaagsan ku dhammaysto”.
“Kooxdani (Xiddigaha kale ee xulka) marka laga yimaado awooda kooxeed ee ay leeyihiin sidoo kale waxay leeyihiin caqli badnaan, way garanayaan sida loo akhriyo daqiiqadaha muhiimka ah ee kulanka, Scaloni ayaa hore u sheegay, waa koox aad u caqli badan”
