Jowhar – ( Radio Isnaay ) – Xiddiga khadka dhexe uga ciyaara Manchester United ee Bruno Fernandes ayaa doonaya in kooxdiisu ay laba xiddig lasoo saxeexato marka uu furmo suuqa ciyaartoyda ee xagaaga, kuwaas oo uu magacyadooda miiska u saaray tababare Ole Gunnar Solskjaer.
United ayaa xilli ciyaareedkan kaalinta labaad kaga dhamaysanaysa horyaalka Premier League, waxayse doonayaan in fasalka dambe aanay sidan ahaanin oo ay horyaalka kula tartamaan Manchester City.
Tartanka Champions League oo ay wareeggii koowaad kaga hadheen, Manchester United ayaa niyad-jabkii soo gaadhay waxay ku daaweynaysaa Europa League oo ay finalka iskugu soo hadheen Villarreal, waxaanay tahay kooxda loo saadaalinayo in ay koobkan ku guuleysan doonto.
Si kastaba, United ayay diiraddeedu saaran tahay sidii ay xilli ciyaareedka dambe ugu guuleysan lahayd koobab waaweyn, iyadoo xiddigaha ay haysato kusoo kordhinaysa kuwo kale oo sare usii qaada tayada kooxda.
Xiddiga reer Portugal ee Bruno Fernandes ayaa u sheegay Solskjaer in la gaadhay waqtigii ay kooxdu ku guuleysan lahayd koobab, balse ay tahay in ay labadan ciyaartoy lasoo saxeexdaan.
Fernandes oo sannadkan Manchester United u dhaliyey 27 gool iyo 17 kale oo uu caawiye ka noqday dhamaan t artamada, ayaa waxa uu ka mid yahay murashaxiinta abaal-marinta xiddiga sannadka ee PFA Player of the Year, iyadoo kooxdiisuna ay qorshaynayso in ay siiso qandaraas cusub oo ay ku kordhiso heshiiskiisa oo mushaharkiisa laga dhigo illaa £200,000 Gini toddobaadkii.
Labada ciyaartoy ee uu Bruno Fernandes doonayo in ay lasoo saxeexato kooxda ayaa waxay kala yihiin kubbad-burburiye wanaagsan oo tayo leh iyo difaac.
United ayaa horeba loola xidhiidhinayay difaaca Villarreal ee Pau Torres, Raphael Varane iyo Real Madrid ah iyo Jules Kounde oo Sevilla u ciyaara, halka khadka dhexena la tilmaamayo in ay doonayaan Declan Rice oo West Ham ka tirsan.
