Jowhar – ( Radio Isnaay ) – Warar soo baxaya ayaa sheegaya in dawladda Federaalka ah ee Itoobiya ay wado dadaalo ay gurmad ugu sameyneyso dadka shacabka ah ee ku nool gobolka Tigrey.
Xafiiska Ra’iisul wasaaraha dalka Itoobiy Abiy Ahmed ayaa waxaa la sheegay in uu qorsheeyay in ilaa 30 gaari oo ay saran yihiin Raashin mucaawino ah ay ku wajahan tahay gobolka Tigrey , ee ay dhawaan dawladda Itoobiya kala soo wareegtay TPLF.
Waxaa sidoo kale jira deeq daawo ah oo ay dawladdu ugu talo gashay in la geeyo gobolkaasi, waxaana ay saara yihiin ilaa tiro Saddex ah,sida ay sheegayaan ilo wareedyo laga helay xafiiska ra’iisul wasaaraha dalka Itoobiya Abiy Ahmed.
Deeqdan ayaa waxa ay si gaar ah u tagi doontaa magaalada Makhalla ee caasimada u ah gobolka Tigrey, maalinta berri oo Sabti ah ayaa lagu wadaa in Raashinkaan la qabiyo.
Dhanka kale, dawladda Itoobiya ayaa iska diiday eed loo soo jeediyay, taas oo ku saabsan in ay ishortaagtay, shaqaale gar gaar oo ka tirsan Qaramada Midoobey.
Sidoo kale toddobaadkan gudihiisa, ayaa Qaramada Midoobey waxa ay ku eedaysay dawladda Itoobiya in ay dhibaatooyin kala duwan u gaysataya qaar ka tirsan shaqaalaheeda, iyadoo sheegtay in dil iyo xarig isugu dartay, inkasta oo dawladda Itoobiya ay diiday.
