Jowhar – ( Radio Isnaay ) – Kooxda Barcelona ayaa lagu soo waramayaa in ay doonayso saxiixa Mohamed Salah marka uu dhamaado qandaraaska uu kula jiro kooxda Liverpool xagaaga.
Salah ayaa dhaliyay goolkii guusha ee ay guusha soo laabashada ah ka gaadheen Brighton sabtidii wuxuuna soo galiyay boggiisa X Fariin qiiro leh oo uu u diray taageerayaasha kooxdiisa.
Heshiiska Salah ee Liverpool ayaa dhacaya dhamaadka xilli ciyareedkan walina kooxda Liverpool uma soo bandhigin heshiis cusub.
Waa markii labaad oo uu si fagaare ah uga hadlo mustaqbalkiisa ka dib markii uu horay u sheegay in uu ku jiro xilli ciyaareedkiisii ugu dambeeyay ee kooxda.
Iyadoo taas maskaxda lagu hayo, wararka ka imanaya Spain ayaa haatan sheegaya in Barcelona ay soo gali karto tartanka loogu jiro saxiixa xiddiga reer Masar iyagoo hore isugu dayay inay la soo wareegaan 2022.
Sida laga soo xigtay Sport, garabka Masar ayaa u furan inuu ku biiro kooxda Barcelona maadama uu la dhacsanyahay mashruuca Barcelona.
