Jowhar – ( Radio Isnaay ) – Xulka Italy ayaa guul uu ka gaaray Turkey ku daah furtay Koobka Qaramada Yurub ee EURO 2020, kaddib markii uu kaga adkaatay 3-0.
Qeybta hore ee ciyaarta ayeey labada xul qaran Italy iyo Turkey ku kala nasteen bar-bardhac 0-0 ah.
Qeybta labaad ee dheesha marka dib leysugu soo laabtay labada dhinac ayaa waxay soo bandhigeen qaab ciyaareed aad u wanaagsan, iyagoo sameeyay fursado badan ee goolal loo filan karay.
Daqiiqadii 53-aad xulka qaranka Talyaaniga ayaa hoggaanka u qabtay ciyaarta, kaddib markii uu gool iska dhaliyay xiddiga reer Turkey ee Merih Demiral, ciyaarta ayaa sidaas ku noqotay 1-0.
66 daqiiqo marka ay dheesha mareysay Xulka Italy Ciro Immobile oo caawin ka helay saaxiibkiis Leonardo Spinazzola ayaa wuxuu ciyaarta ka dhigay 2-0.
Daqiiqadii 79-aad Xulka Italy ayaa sii dheereystay hoggaaminta dheesha kaddib markii uu 3-0 ka dhigay Lorenzo Insigne oo caawin ay kaga timid saaxiibkiis Ciro Immobile.
Ugu dambeyntii ciyaarta ayaa ku dhammaatay 3-0 uu kaga adkaatay xulka Italy, dhigiisa Turkey-ga, xilli kulankan lagu daah furay GROUP A ee Koobka Qaramada Yurub ee EURO 2020.
